ايوة حسيتك حياة.. شعر

شعر – إيمان السقا

فاكر دموعك او نسيت
لو نسيت… انا قلبى فاكر
لما يومها عليك قسيت .
يومها قلت انا ليه تملى
برضى بالأمر المتاح؟!
كنت بتكلم ساعتها . ع إللى راح
وانت فكرت انه ليك.
دمعتك فرت قصادى
كنت شايفه كلامى… عادى
او ماشفتش _
جوا منه اهانه ليك
دمعتك دبحتنى جدا
نازله اه على خدك انت_
بس نارها جوا حضنى.
كنت قاسيه ايوة فعلا_
بس قسوة كات لخوفى ..
شوف ظروفى…. راح تقدر
ليه ساعتها انا كنت خايفه
منك انت ؟
استحالة !!
كل خوفى كان عليك_
استمالة منى ليك
كنت بحضن خوفى بيك_
يمكن اهدى
يمكن اتطمن وانام.
كنت خايفه تكون منام !
يجى وقت ومنه اصحى
كنت ناصحه ف كل حاجه….
الا وقت وجودى جمبك
كنت باخد فكرى منك_
طفلة تايهه…
فجأة تعرف حضن ابوها
يبقى خوفها ف يوم يغيب
مش كنت بنتك؟
ايه الجديد؟!
فاكر ساعتها عملت ايه
يومها بصيت جوا عينك
لاءه . قصدى جوا قلبك
صدق دمعك
قالى اوعى فى يوم تخافى_
مهما يحصل او تشوفى_
ضحكتك مالهاش بديل.
اوعى حد فيوم يفكر
يجرح الطفلة البريئه جوا منك
حبى ليكى ملاك وحارس
مهما كنت بعيد عليكى او قريب.
ذكرى يومها ليه معدى قصاد عيونى؟!!!!
والسؤال بيرن دايما
ليه…… تهونى؟!
شئ مخيف
لا شئ سخيف
اوعى تنكر…
ان دمعك كان حقيقى
اوعى تحلف ان قصدك يوم فراقنا كان لخيرى
اى شئ قوله هاصدق….
غير انى كدابه ف شعورى
لما حسيتك حياة..

إغلاق